പുഴ.കോം > പുഴ മാഗസിന്‍ > കവിത > കൃതി

മൂന്നു ചൈനീസ്‌ കവിതകൾ

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
സി.കെ.മധു


ജീവിതം - വാങ്ങ്‌ഗുവോഷാ

നിങ്ങൾ സന്തോഷത്തെ സ്വീകരിക്കുമ്പോൾ
യാതനകളെയും സ്വീകരിക്കേണ്ടതുണ്ട്‌
സമചിത്തനായ്‌ വാഴുമ്പോൾ
വിഭ്രാന്തിക്കും നിങ്ങളടിപ്പെടാം.
നിങ്ങളൊരാളെ കീഴടക്കുമ്പോൾ
നിങ്ങളും കീഴടക്കപ്പെടുന്നുണ്ട്‌.
ഒരു ചുവട്‌ മുന്നേറുമ്പോൾ
ഒരു ചുവട്‌ നഷ്‌ടമാകുന്നുണ്ട്‌
പ്രഭാതത്തെ പുണരാൻ വെമ്പുന്ന
നിങ്ങൾക്കെങ്ങിനെയാണ്‌
സായന്തനത്തെ നിരസിക്കാനാവുക.



ശരത്‌കാലം - ഫാങ്ങ്‌ബിങ്ങ്‌

കൊഴിഞ്ഞ ഇലകൾ
നിമിഷം തോറും
എന്റെ ജാലകത്തിലുരുമ്മി
താഴേക്കു പതിക്കുന്നു
കാറ്റിന്റെ വിളയാട്ടംപോൽ
വാതിൽ ഞരങ്ങിതുറന്നു
വന്നതെന്റെ അയൽക്കാരന്റെ
മൂന്നുവയസ്സുപുത്രി
ഇരുകൈകളിൽ തുടുത്ത ആപ്പിൾ
അവൾ പിടിച്ചിരുന്നു
അതവൾ എനിക്കു നല്‌കി.



വൃദ്ധകന്യക - ഷാങ്ങ്‌യി

ഒരുനാൾ നീ കടൽക്കരയിലൂടെ
ചന്ദ്രനെ കൈകുമ്പിളിലാക്കാനോടി
ഒരുനാൾ നീ പെരുംകാട്ടിലിരുന്ന്‌
സൂര്യനെ പുണരാനായി പാട്ടുപാടി
എന്നാലോ-
ഒരുതുളളി ശരത്‌കാല മഴ
പൊഴിഞ്ഞപ്പോൾ
സൂര്യനും ചന്ദ്രനും
മഴയിൽ കുതിർന്നലിഞ്ഞു
അനേകവർഷങ്ങൾ പൊഴിഞ്ഞു
ആരുമറിയാതെ
നീ രഹസ്യമായ്‌ സൂക്ഷിച്ച
നിന്റെ കണ്ണുനീർ
ഉപ്പായുരുകുന്നു
അഗ്നിയാളുന്ന നിന്റെ
പാദസ്‌പർശമേറ്റ്‌
പച്ചപുൽമേടുകൾ
വെണ്ണീറായി ! !


(അവലംബം - ചൈനീസ്‌ ലിറ്ററേച്ചർ മാസിക)

സി.കെ.മധു

സി.കെ. മധു, ചിറക്കൽ വീട്‌, കണ്ടക്കടവ്‌ പി.ഒ., കൊച്ചി - 682 008.


Phone: 0484 2282269




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.