പുറകിലൂടാരെന്റെ മുഖം പൊത്തുന്നു........
നിമിഷങ്ങൾ -
നീല ഞരമ്പായ് പിടയ്ക്കുമ്പോൾ -
വെയിൽ ചായുമോർമ്മയിൽ
ദിശകൾ മറയുമ്പോൾ
ആരു വന്നെൻ നിഴൽ കണ്ണുകൾ
മൂടുന്നൂ.......
അകലത്തെ കാഴ്ചയായ്
അലകടൽ തേങ്ങുമ്പോൾ
വ്രണങ്ങളിൽ നഖമാഴ്ത്തി
രസങ്ങളെ കവരുമ്പോൾ
തൊണ്ട തടയും കരൾപ്പാട്ടാ-
യാരെന്റെ - കേൾവിയിലുടക്കുന്നൂ........?
കരിയിലയിലമരുന്നൊ-
രറിയാത്ത ഭീതിയും
കരുവണ്ടു മുരളുന്ന ചിന്തയും
ഇനിയും ചിരിക്കാത്ത നനവാർന്ന മിഴികളും
മാറോടടുക്കുമ്പോൾ
പുറകിലൂടാരെന്നെ തൊട്ടു മറയുന്നൂ......?
വേനൽവരൾച്ചയിൽ വർഷമേഘങ്ങൾ പടിയിറങ്ങുമ്പോൾ
ഇടറും വസന്തത്തി-
ന്നിതളുകളടരുമ്പോൾ
ആരുവന്നെൻ കൺതടങ്ങളി-
ലോർമ്മ തൻ
കനലുരുക്കുന്നൂ....
കാഴ്ച്ചകളലറിക്കരയുന്ന
ഇരുൾ വീണ വഴികളിൽ
ഉലയുന്ന മൺചെരാ-
തുടയുന്ന മൗനത്തിൽ
കാൽവഴുക്കും പടിത്തിണ്ണയി-
ലാര്......?
എൻ കാഴ്ചകൾ
മറയുന്നൂ..............