നിലാവിന്റെ സംഗീതം,
ചീവീടുകളുടെ മുരള്‍ച്ചയായിരുന്നു
ജാലകങ്ങള്‍ക്കക്കരെ ചാഞ്ഞു വീഴുന്ന
മഴനാരുകള്‍;
പറയാതടക്കിപ്പിടിച്ച സ്വപ്നങ്ങളുടെ
വിങ്ങലുകളും.........
പകുത്തു നല്‍കിയ ഹൃദയം,
വലിച്ചെറിയപ്പെടുമ്പോള്
ഞാന്‍ മാത്രം എന്തിനു ചിരിക്കാതിരിക്കണം?
പറയാന്‍ കാത്തു വച്ചതും,
എഴുതാന്‍ മറന്നു പോയതും,
ഊഴം തേടിയലയുമ്പോള്‍;
പങ്കുവയ്ക്കപ്പെടാതെ പോയ സ്നേഹം
ചിതലരിച്ച പാതി ഹൃദയത്തില്‍
നഖമുനകളാഴ്ത്തി പിടയുന്നിപ്പോഴും....
ഉണങ്ങി വരണ്ട സൗഹൃദങ്ങള്‍ക്കും,
ക്ലാവു പിടിച്ച ബന്ധക്കണ്ണികള്‍ക്കും,
തിരിച്ചറിവുകളില്‍ സ്ഥാനഭ്രംശം
പെയ്തൊഴിഞ്ഞ സായന്തനങ്ങള്‍ക്കും ,
സ്വപ്നങ്ങള്‍ ചിറകു വിടര്‍ത്തിയ നിശായാമങ്ങള്‍ക്കും
അറിഞ്ഞു, മറിയാതെയും നെയ്ത പ്രണയ കാവ്യങ്ങള്‍‍ക്കും
തിരിച്ചറിവുകള്‍ക്കപ്പുറമൊരു യാത്രയുണ്ടാവുമോ?!
