പുതിയ നിയമം
അവൻ
നമുക്ക് പട്ടണങ്ങളിൽ ചെന്ന് രാപാർക്കാം. തിയറ്ററുകളിൽ സിനിമ മാറിയോ എന്നും ലോഡ്ജുകളിൽ മുറികളൊഴിവുണ്ടോ എന്നും നോക്കാം. അവിടെവെച്ച് നിനക്കെന്റെ പ്രേമം തരും.
അവൾ
ചുവന്ന തെരുവിലെ വേശ്യമാരേ, നിങ്ങൾ എന്റെ പ്രിയനെ കണ്ടാൽ ഞാൻ കാമപരവശയാണെന്നവനോട് പറയുക.
* * * * * * * * * * * * * * * * * * * * * * * * * *
നീതി
ഉത്സവപറമ്പിലെ ചീട്ടുകളി കൈയോടെ പിടികൂടിയ പോലീസുകാർ കൈമടക്കു വാങ്ങി വീണ്ടും കളി നടത്താൻ അനുമതി നൽകി. പോലീസുകാരും കളിയിൽ ചേർന്നു. കൈമടക്കു വാങ്ങിയ പണവും കൈവശമുളള പണവും പോയപ്പോൾ പോലീസുകാർ വീണ്ടും വിസിൽ മുഴക്കി കൽപ്പിച്ചു. “കളി വീണ്ടും പിടിച്ചിരിക്കുന്നു.”